Milli Məclis bu gün, dekabrın 30-da "Media haqqında" yeni qanun layihəsini üçüncü oxunuşda da qəbul edib
Milli Məclisdən verilən məlumata görə, qanun media sahəsində fəaliyyətin təşkilati, hüquqi, iqtisadi əsaslarını, həmçinin kütləvi informasiyanın əldə olunması, hazırlanması, ötürülməsi, istehsalı və yayımının ümumi qaydalarını müəyyən edir. Sənəd 9 fəsil 78 maddədən ibarətdir.
Qanunda jurnalistlərin fəaliyyətinə dair məsələlər, Media Reyestrinə daxil edilmiş jurnalistlərə müvafiq vəsiqənin verilməsi, onlara bəzi imtiyazların müəyyənləşdirilməsi, dövlət qurumlarında jurnalistlərin akkreditasiya qaydaları, jurnalistin fəaliyyəti üçün şəraitin yaradılması və digər məsələlər əksini tapıb.
Dekabrın 24-də və 28-də bir qrup jurnalist Milli Məclisin önünə toplaşaraq layihəyə etirazlarını bildirmişdilər. Onlar xüsusilə jurnalistlərin Media Reyestrinə daxil edilməsi ilə bağlı maddənin üzərində dayanırdılar. Aksiya iştirakçıları hesab edirdilər ki, bütünlükdə bu layihə müstəqil medianın susdurulmasına və bu sahənin tam hökumətin nəzarətinə keçməsinə imkan verəcək.
Aksiya iştirakçıları vurğulayırdılar ki, layihə, ümumiyyətlə, müzakirədən çıxarılmalı, onun yenidən işlənməsi üçün müstəqil ekspertlərlə birgə işçi qrup yaradılmalıdır.
Mənbə: AzadlıqRadiosu
"24 saat"
Hiç yorum yok:
Yorum Gönder